Ithnak ri neu ti maw?
Ri bang pah in I velh, I pen
A kho ngai tin ruat ngah cop lai
Pakhat hnua pakhat min thliahthlo
Laivut neu bang, siatnawi bang pah
I ruang pumpui veksen I khuk
Mer khai thil lo, haihawh khai sam
I thi ruai tuh menma maw, ithnak?
A mawi hlaihlawr, a rimhmui ngai
Papar mawi ber, ithnak par tin
Parmawi neu thawn thu santeh de
Aw ithnak neu, thungai fang tu
Kut in khuarhnak siatnawi tikhur
A song tolh fang, siatnawi min tuh
Kai ling hlen ing ithnak neu.
Um I hiam i,
Harsa tawk khai, I lingthiamtu
Mithmai zal thawn catlo thape
Awka hlum neu, a kang song ah
Thinnuam ngai in um I hiam.
A ma’n I hai, thinghnah khai ro
A kak kawngkolh, a hnah tawt lo
Khal nisa par, voi menma tuh
Thinpem thinhnawm, cim thil lo ing
Kaima lek ian, hlanlai bang in
A hla ngai an ngai hlen tuh.
I hnawn tuh nia, ni nikhat khiah
Khualsi lamkhung a bo hmun hleng
Linglo i lo, thinsup ben lo
I pon pui le I tuar pui tuh’n
A thinthip so tang i nim?
Thil a canghnak, kaima khelh sio
Nawng song ah pel, I umhnak te
Kaima cen in ling hlen napui
Kumzangza ai um kawm tuh in
Kai ko ngam lo, ko siang lo ing
A hiam hmun ah um tu hlen seh!
It ing
I sohnar hlin
Second khat song
I sikhnak ah I sohlin.
Ngai ing
I dangkhun ai a lut teu hnak
Ponkam pakhat
Kaima neu lek a vakhmun cuan
Kai I ngaihnak kaima ling.
Kaima lek
I thinlung song lam tian
Aisu’n ling lo I maihma thawn
Kaima la la khai ling dun.
Aw ithnak neu
Kaima ai I ruathnak te
Na lungthin song an
Ngai in hmu tu ve law!
Ithnak thinlung nai tu law!
Aw zilhli neu
A loih pha um lo man
I thinlung khiah loih in
Laipua ah I dah i sim?
Nikhat song I ruathnak te heh
Nangma thu lolek i tihnak
Na thin song ah hleng lo i awm?
Aw
Kap khal ing lai, zai santlailo
Nang in I hlum teu napui,
Na sohlin aw te I biang vum ah
Tang hlen lai man hmainor tuh ing.
I hnihsan tu ngawn
Santlailo val pa kai hnen an
Na suak teu hnak te
I bawngpha man…tin.
Ngaihnak pawl hrang naper kul
Cimhnak te heh na hrang ah ngawn
I sohlin cang ah um lo i,
Inapui, na cimhnak vum ah ngawn
Biazai pakhat ngan tuh ing.
Tunhnua na hih can fang
A thup neu in thut tu law!
Kap ngawn kap ma law!
Pha lo in khai run-inn
Pha in khai run-inn
Run-inn ruah zun beh sio le khaw
Cam hniahno lo’n rem tu law!
A khang le bang hnawm sio ta le
Ai-im lo in rem tu law!
Innbo inn kak mot sio ta le
A phalohnak a hlun pawl khiah
A thar rol in, lungmu neu le
Kin thazang thawn thar ruai a sing!
Ni nikhat ai
Cucan cang ah
Ruathnak song cam
Ngaihnak te cen
Mithli ah far
Zaiman i ni?
Kaima la la
Lungthin Kho tin um de napui
“Mi cen zawl thil a si,
Mah la la cen zawl thil lo”
Tihnak ponkam neu in
Mi rauhla bang I zing tio lai.
Daih dun lo hang ti napui,
Kin vak kawm hmun Malay ram le
Nazi 8 fang pau de, I phone te heh
I hrang memorial neu i hang.
A hlan ai bang in
Na hmelmawi neu sik thil can te
Ngah sal I hiam.
A hlan ai bang in
Na thinraw fang na hni thai in
Na zawl sal I hiam.
A hlan ai bang in
Ithnak nang thawn ni nikhat song
Pon dun thil hnak can pha neu te
Ngah sal I hiam.
A hlan ai bang in
Na ngai ruai hnak zaila neu te
Ngai sal I hiam.
A hlan ai bang in
Na kuathnak message neu te
Siar sal I hiam.
Kai na van tio de
Na mi tuamhlawm dan neu te.
Kai um ngai in iang
Na mithmai zal neu te.
Kai I daih ngai
Na ithnak parmawi neu te.
Kai za I hiam
Kumkhua in na it tuh ing tihnak ponkam.
Ikhalselai…
Kai I daihlo ber tu
Khekdunhnak ponkam.
Ithnak neu ian I nunram tin
A tun le tun rel thai tio de
I ithnak ber I rualpui in.
Haihawh nailo
Deuh miahmo de, si-ar te rin
Khuathim hlaihlawr hla pai zan ah
Khua hmu thai in phathnak bawn i.
Haihawh nailo
A hnah tam ngai hing thlurhthlo de
Hlalang kung pui rin a nihlim in
Hlan khiah dap ruai phathnak bawn i.
Haihawh nailo
Mi’n fon menma lungto neu rin
Kin vak tuh hmun lampui nuam ngai
Feh thil thai in phathnak bawn i.
Aw I rual pha
Thungai fang tu minung i si
Ithnak neu ian I nunram tin
A tun le tun na relhnak te
Thingkung arsi lungto neu ten
Na hnihsan tlang miahmo hang!
I bil song ai a luthnak
A bobak ngai
Ponkam pakhat
Vang in tumtawng cem.
Cia ben
I lu khiah
Kai tung vut le
Khuang aw pawl lak ah
Nuam bang in I lam fang
Rel siat tahlah e,
Ruang pumpui zang…
Thinlung te zang…
A zuang in zuang.
Zomzet in a luang hnak
Runti bang bang…
Rawnti bang bang…
Zai I cang khai linglo hang.